83 ka job order sa Tudela gitaktak

CEBU, Philippines – Mokabat sa 83 ka mga kawani sa lungsod sa Tudela ang gitaktak sa ilang serbisyo atol sa pag-asumir sugod kagahapong adlawa ni Mayor Rogelio Baquerfo, sila pulos mga tinudlong kawani sa gipakanaog nga mayor nga si Demetrio Granada.

Si Baquerfo inabagan sa mga representante sa Department of Interior and Local Government (DILG) ug Commission on Elections (COMELEC) ingon man kapulisan pormal nga miasumir og balik sa katungdanan sugod alas 8:00 sa buntag kagahapon human boluntaryong mikanaog sa pwesto si Granada.

Gibutyag ni Baquerfo atol sa interview sa Bantay Radyo nga walay nahitabong formal turnover sanglit wala na mopakita si Granada sa munisipyo.

Gisugdan dayon kagahapon ang pag-atiman ang mga problema sa lungsod sulod sa pito ka bulan samtang si Granada pa ang midumala sa lungsod.

Si Baquerfo mipahibawo sugod kagahapon sa pagtangtang sa serbisyo sa 83 ka mga job order employees nga gi-hire ni Granada nga wala pa usab makadawat og sweldo.

Si Baquerfo mihulagway nga dili gyud makadawat sa gibana-banang hapit tunga sa milyon nga kobrahunong suholan ang maong mga kawani tungod kay ilegal ang ilang appointment nga pirmado ni Granada nga dili lehitimong mayor sa lungsod.

Matud pa niini isip usa ka lehitimong mayor bisan og wala siya mag-opisina sa lungsod niadtong milingkod si Granada duna siya'y kabalakang siya maoy makwestyon sa Commission on Audit kun mopagawas og pundo alang sa suholan sa maong mga gitangtang nga mga kawani.

Nunot niini miapilar sab si Baquerfo sa mga department heads ug kawani, ingon man kooperasyon sa konseho alang sa hapsay nga pagdumala aron maatiman ang tanang na-pending nga proyekto ilabina kay hapit na usab ang eleksyon sunod tuig. – Darrel Carumba (BANAT NEWS)