Taga Barangay Luz naningil sa P5 milyones ni Magsaysay

CEBU, Philippines – Naningil ang mga residente sa barangay Luz ngadto sa buhatan ni Mayor Tomas Osmeña kun asa na ang P5 milyones nga pundong gihatag ni kanhi Senador Ramon Magsaysay Jr. aron ipalit sa yuta nga ilang gi-okupahan karon.

Usa ka residenteng midumili pagpaila sa iyang pangalan nga miduol sa DyRF nagkanayon nga ang mga molupyo sa barangay Luz dugay nang nagpaabot kanus-a nila mapahimuslan ang maong pundo.

Sumala pa sa maong reklamante ang P5 milyones gikan sa Priority Development Assistance Funds (PDAF) ni   Magsaysay.

Sigun pa sa reklamo nga sukad nga gitunol sa senador ang tseke ngadto ni   Osmeña niadtong tuig 2007, wala na gyud sila makadungog pa kun asa na ang maong pundo.

Mipasalig hinuon si Cebu City Public Information Officer ug South Road Properties (SRP) manager Nigel Bañacia nga iyang hatagan og pagtagad ang maong reklamo.

Matud pa ni Bañacia nakadungog siya sa maong pundo gikan ni   Magsaysay alang sa lote sa barangay Luz apan wala lamang siya magtagad niini.

Hinuon si Bañacia misaad nga iyang pakigtagbuan si city administrator Francisco Bimbo Fernandez aron makuhaan nila og update sa maong proyekto. – Chester Abadilla (BANAT NEWS)