CEBU, Philippines - Suspetsado sa pagpatay kang PO3 Benjamin Racaza nga si Anthony “Tonton” Aves giingong kanunay’ng masigpatan sa ilang lugar sa sitio Litmon, barangay Poblacion, dakbayan sa Talisay.
Si Insp. Paul Vincent Dorado sa Talisay City Police Station pagkasayod sa maong impormasyon daling milusad og operasyon alas 9:00 sa buntag kagahapon apan napakyas ang grupo pagdakop kang Aves.
Si Dorado nagkanayon nga pag-abot nila sa balay sa suspek nagsiga ang suga sa balay ug abli ang bintana apan walay tawo sa sulod apan nasayran nga dugay nang wala magpuyo diha ang mga kabanay ni Aves.
Si Dorado midugang nga usa sa mga silingan ni Aves mibutyag nga nasugatan niini ang suspek kinsa nagsul-ob og kalo dihang mibisita kini sa ilang balay.
Si Aves mipusil ni Racaza usa ka buwan na ang nakalabay gumikan lang sa manok igtatari. - Brenda Batuto (BANAT NEWS)