Writ of execution gipangayo ni Bacquerfo

CEBU, Philippines - Subling mibisita kagahapon sa buntag si Mayor Rogelio Bacquerfo sa lungsod sa Tudela sa buhatan sa pangulo sa kapolisan sa lalawigan aron pangayuon ang kopya sa writ of execution gikan sa Department of Interior and Local Government (DILG)-7 nga nag-ila kaniyang maoy mayor sa nahisgutang lungsod.

Si Sr. Supt. Jesus Gacquing Sr., hepe sa kapolisan sa lalawigan mibutyag sa mga tigbalita sa press conference kagahapon nga iya nang nadawat ang writ of execution gikan ni regional director Pedro Noval sa (DILG)-7 apan iya unang giduso ang maong order ngadto sa buhatan ni Chief Supt. Lani-O Nerez alang na sa pag-abag kanila kung kini hingpit nang ipatuman ang maong order didto sa Tudela.

Nasayran nga si Mayor Demetrio Granada boluntaryo nang mikanaog sa puwesto pagkamayor sa maong lungsod.

Sayo niini, si Bacquerfo mihangyo sa kanhi Officer in Charge (OIC) sa Cebu Provincial Police Office, Supt. Erson Digal nga iyang pailisan ang tanan niyang polis tungod kay nasagulan na og politika.

Apan si Gacquing sa iyang bahin nagkanayon iyang tun-an ang maong hangyo apan kun duna man gani ilisan sa iyang mga polis kana dili tanan tungod kay dunay mga senior police officers nga dili mahimong pahulipan kay gikinahanglan usab kaayo sila didto sa maong lungsod.

Hinuon nitataw si Gacquing nga sa pagkakaron ang kinatibuk-ang lungsod sa Tudela malinawon ug wala siya'y nadawat nga report nga dunay kagubot tali sa mga supporters sa duha ka politiko. - BANAT NEWS