CEBU, Philippines - Gipadayag ni kanhi mayor Alvin Garcia nga wala pa gyud siya hingpit makadesisyon kun magpapili ba og balik pagka-mayor sa 2010 election atbang sa suportahang kandidato sa Bando Osmeña pundok Kauswagan (BOPK) ni Cebu City Mayor Tomas Osmeña.
Apan giangkon ni Garcia nga padayon na silang nagtigum sa oposisyon aron pagpili nila ni Atty. Aristotle Batuhan og standard bearer sa oposisyon dinhi.
Apan matud pa ni Garcia pagkakarun nagpaabot pa gyud siya sa dagan sa lakang nga pag-computerize sa 2010 election ug kun makompleto na una pa siya mopagawas sa iyang desisyon.
Wala mabalaka si Garcia nga posibleng mauwahi na unya siya sa kampanya kun magdugay dugay og pahibawo sa iyang desisyon tungod kay matud niya wala pa malabwi sa kasamtangang administrasyon ni Osmeña ang iyang mga nahimo sa duha ka terminong iyang gidumala ang dakbayan kaniadto.
Kini sama sa pagpatukod niya og subra sa 200 ka mga classrooms, ang pagpatukod niya sa SRP nga matud pa niini nahuman na dihang ni-asumir si Osmeña.
Si Jonathan Guardo mao nipahibawo atol sa launching sa produkto niini nga gitambungan ni kanhi presidente Joseph Estrada nga magbutang sila og lig-ong mga kandidato batok sa BOPK ug si Garcia maoy ilang standard bearer.
Nasayran nga si Osmeña anaa na sa ikatulo ug katapusang termino ug nituboy kang Bise Mayor Michael Rama nga maoy paluyohan pagka- mayor ug samtang siya (Osmeña) maoy gipaabot nga moatbang ni Guardo pagka-kongresista sa South district. – BANAT NEWS