CEBU, Philippines – Gihatagan og pasidungog sa mga kadagkuan sa Police Regional Office (PRO-7) ang kapulisan sa mga dakbayan sa Mandaue ug Talisay gumikan sa ilang kalampusan sa pagsulbad sa panulis nga mikalas og kinabuhi sa ilang tagsatagsa ka lugar.
Ang nakadawat sa Medalya ng Kasanayan mao ang mga sakop sa Mandaue City Police Office (MCPO) nga gipangulohan sa ilang hepe nga si Sr. Supt. Orlando Ualat ug Talisay City Police Office (TCPO) nga gipangulohan sa ilang hepe nga si Supt. Henry Biñas.
Ang MCPO gipasidunggan tungod sa dali nga pagkasikop sa mga suspetsado sa pagtulis sa LBC Express office sa Barangay Guizo sa maong dakbayan. Samtang ang TCPO kauban sa 26 ka mga tanod sa barangay Cansojong nakadawat usab sa maong pasidungog gumikan sa daling pagkasikop sa mga mitulis ug mipatay kang Fr. Jovencio Rabusa.
Si PRO-7 Chief Supt. Lani-O Nerez kauban sa ubang mga opisyal sa PRO-7 maoy nangunay sa paghatag sa maong mga medalya sa maong mga police unit.
Gawas sa medalya, si Nerez mihatag usab og tagsa ka unit nga computer sa maong mga buhatan sa kapolisan. – Guam P. Logroño (BANAT NEWS)