International port tukoron sa Naga

CEBU, Philippines – Nagplano ang kagamhanan sa lalawigan sa Sugbu nga motukod og international port sa lungsod sa Naga kini maoy rason nganong gipalit ang 25 ka ektaryang lote sa Balili Resort sa lungsod sa Naga nga balor og P100 milyones niadtong miaging tuig.

Giangkon ni Garcia nga niadtong miaging tuig sa ilang pagpalit sa maong lote wala kini motumaw nga plano tungod kay ang proposal sa maong project mao ang pagtabang sa probinsiya sa lungsod sa Naga pagtukod og industrial zone ug butanganan sa mahimo nga coal ash gikan sa Korean National Power Corp. kon KEPCO.

Gipasabot sa gobernadora nga niturok ang iyang plano sa pagbalhin sa international port gikan sa Sugbu ngadto na sa Naga dihang iyang nahibaw-an pinaagi sa Mactan Cebu Bridge Management Board nga ang pag-agi sa mga dagkong mga barko sa Mactan Channel nakahulga sa kalig-on sa pundasyon sa duha ka taytayan sa Mactan.

Dugang pa sa gobernadora nga dako kaayo og kahigayonan nga matukod gyud ang maong plano tungod kay ang lungsod sa Naga mao lamang ang bugtong lungsod nga makonsiderar nga industrialized town sa habagatang bahin sa lalawigan.

Samtang si Atty. Rory Jon Sepulveda miingon nga siya maoy motubag sa petisyon sa duha ka mga environmentalist lawyers nga nangangkong makadaot  sa mga tawo lakip na ang nagpuyo sa kadagatan ang coal ash nga itambak sa Balili beach.

Si Atty. Sepulveda nagkanayon nga may engineering analysis data silang nakuha gikan sa Salcon nga ang coal ash di matawag nga hazardous materials gani mahimo pa kining gamiton isip structural filling materials ug mahimong usa sa mga dakong sagol sa pagama og semento.

Matud pa ni Atty. Sepulveda nga ang maong coal ash haum kaayo nga mahimong filling material alang sa usa ka reclamation.

Gihagit ni Sepulveda sila si Atty. Benjamin Cabrido Jr. ug Atty. Gloria Estenso Ramos nga mopakita sa ilang awtoridad o ba kaha basehan sa pagpangangkong makadaot ang abo. – BANAT NEWS