PDEA-7 agents gibato

CEBU, Philippines – Gibato ug gipabuthan pa og armas sa mga residente ang mga sakop sa Philippine Drug Enforcement Agency (PDEA)-7 atol sa ilang buy-bust operation niadtong Domingo pasado alas 5 sa hapon diha sa barangay Tangke siyudad sa Talisay.

Naguba ang sakyanan sa mga sakop sa PDEA-7 human gitabangan og hapak og bato sa mga residente dihang gidakop ang usa ka ginang nga giilang si Marbee Torion, 23, kansang bana nga si Ramon “RJ” Torion,27, giingong tigpayuhot og ilegal nga drugas sa maong dapit apan nakaikyas.

Nakuha sa posesyon sa panimalay sa magtiayong Torion ang 62 ka paketeng may sulod nga gituohang shabu lakip na niini ang usa ka pakete sa buy-bust operation ug cellphone sa mga suspek.

Si Yogi Filemon Ruiz, deputy regional director sa PDEA-7 nga nahinabi sa Banat News mitug-an nga nabuak ang bildo sa luyong bahin sa ilang sakyanan nga L-300 van human gitabangan og hapos og bato sa mga residente.

Dugang pa ni Ruiz nga nakadungog usab sila og lima ka buto sa armas gikan sa panon sa mga tawong midugok kanila ug swerteng way nangaigo niini atol sa ilang pagbiya.

Hinuon ila nang nailhan ang balay diin nagagikan ang namusil kanila ug mibahad si Ruiz nga ila kining balikan sa umaabot pang mga adlaw.

Matud niya nga bisan pa og nag-‘people power’ ang mga tawo sa Tangke dili kini maoy ilang basehan nga dili sila mahadlok nga mobalik didto.

“Mag-anad mana sila kung mahadlok ta aning ‘people power’ kunohay sa mga silingan sa pusher, ang ato is to intensify the illegal drugs campaign,” matud pang Ruiz.

Nakadawat og impormasyon gikan mismo kang Supt. Henry Biñas, hepe sa kapolisan sa dakbayan sa Talisay ang PDEA-7 ug nagpatabang kabahin sa illegal nga kalihokan sa magtiayong Torion tungod kay giingong dili na madala nila kung sila (Talisay police) maoy mopahigayon og pagpangronda.

Mokabat og duha ka semana nga nipahigayon og surveillance ang PDEA ug sa dihang napositibo nga namaligya og ginadiling drogas ang magtiayong Torion hinungdan niadtong Domingo ilang gipahigayon ang buy-bust operation.

Sumala pang Ruiz makabaligya og napulo ngadto sa 15 gramos matag adlaw ang magtiayong Torion diha sa ilang panimalay ug ang mamalit kasagaran taga Tabunok, Bulacao ug Minglanilla.

Si Marbee nga nahinabi sa mga tigbalita kagahapon miangkong buwan pa kapin silang namaligya og ginadiling drugas apan igo lang sila hatdan ug namorsiyento niini.

“Nagmahay man ko sir pero ulahi naman ang tanan,” matud pang Marbee nga naghilak sulod sa karsel sa PDEA-7. – BANAT NEWS