CEBU, Philippines – Tulo ka tawo ang naangol sa panagbangga sa duha ka motorsiklo didto sa barangay Cabitoonan, siyudad sa Toledo niadtong Domingo sa alas 12:00 sa udto.
Ang mga angol mao ang mga drayber sa duha ka motorsiklo nga sila si Jose Bayer, 21, ulitawo , nga taga barangay Awihaw ug Mario Menoza, 40 ug si Efrena Bayer, 49 anyos, minyo, kinsa maoy angkas ni Bayer, ang tanan pulos taga Awihaw.
Si SPOI Lorenzo Mahilum, traffic investigator sa Toledo City Police Station mibutyag sa Banat News nga si Bayer nagpabulhot sa iyang motorsiklo paingon sa Awihaw gikan sa Poblacion, Toledo dihang pag-abot niini sa Cabitoonan nagkadinasmagay kini ug ang nagbaguros usab nga motorsiklo nga gimaneho ni Menoza kinsa mikawat sa lugar nga pabor ni Bayer.
Gumikan sa kakusog sa pagbinanggaay nanglupad ang duha ka motorsiklo ug nangalagpot usab ang duha ka drayber ug ang usa ka pasahero nga maoy hinungdan sa pagpangabali sa ilang kabukogan ug pagkabun-og sa kalawasan.
Gihatod dayon sila ngadto sa Toledo District Hospital samtang ang kapolisan padayon pang miimbistigar sa maong hitabo. – Darrel Carumba (BANAT NEWS)