CEBU, Philippines – Gilusad ang Special Visa for Employment Generation (SVEG) nga gipasiugdahan sa Bureau of Immigration and Deportation (BID) didto sa Marco Polo Hotel niadtong Lunes sa hapon.
Si Regional Director Casimero Madarang III sa BID nga gikahinabi sa Banat News mipasabot nga kining SVEG usa kini ka matang sa visa nga makahatag og trabaho sa mga Pilipino dinhi sa nasud ug sa samang higayon makahatag usab og permanenteng status sa mga langyaw nga mga negosyante kinsa may trabahanteng dili mominus napulo ka tawo nga Pilipino.
Busa miingon si Madarang nga pinaagi ning maong programa dali na makatrabaho ang mga walay trabaho dinhi sa nasud.
Niadtong Lunes may 25 ka mga langyaw’ng magpapa-tigayon dinhi sa Sugbu nga nagpadagan sa 13 ka mga kompaniya nga nakadawat og award gikan mismo ni Commissioner Marcelino Libanan tungod kay ang maong mga kompaniya nakapatrabaho og mikabat sa 1,370 ka mga Pilipino.
Midugang si Madarang nga dugay na kining maong programa nga gipatuman apan niadto lang Lunes ilusad dinhi sa Sugbo. Ang BID mobutang og One Stop Shop center didto sa Manila nga maoy manawat sa mga aplikanteng gustong mopahimus niining SVEG Visa. – Rey B. Pasaporte (BANAT NEWS)