Manag-uyab gi-hold kay wala kabayad sa 'short time' sa motel

CEBU, Philippines – Manag-uyab gidakop sa mga security guard human giingong wala mobayad sa ilang pag-check in sa ilang motel nga nahimutang sa may North Reclamation Area ning dakbayan sumala pa sa usa ka report sa radyo.

Ang maong manag-uyab (mga pangalan ug trabaho gitago) sumala pa sa usa ka wala magpailang source sa report sa DySS nga ang duha gi-hold sa mga security guards sa maong motel human mabantayi sa mga staff nga nag-ulhos-ulhos sa paggawas. Ang duha dihang gipaninglan sa bayad nga P290 sa ilang short time wala makaabot sa maong kantidad sanglit pulos diay kulang ang ilang salapi dihang nagtagay sa himaya sa maong motel.

Ang lalaki giingong duna ray kapin sa P40 nga dalang kuwarta samtang ang babaye duna lay P70 niadtong higayona.

Matud pa nga ang duha wala magtuong pareho diay silang walay mga dalang kwarta dihang misulod sa maong motel ug nagdahom nga ang usa kanila maoy moabaga sa bayad.

Pipila ka minutos nagkasabot ang staff sa motel pag-release kanila apan gipabilin nalang ang cell phone sa lalaki isip collateral sa ilang bayranan. – Guam Logroño (BANAT NEWS)