CEBU, Philippines - Kapin usa ka gatos ka polis nga bag-uhay pang mitapos sa ilang classroom training sa Regional Training School -7 ang mopaubos sa Field Training Program sa Metro Cebu ug gisugdan na sa pag-deploy sa kadalanan sa mga siyudad.
Sa Cebu City Police Office (CCPO) adunay 92 ka FTPs nga nagsugod na sa pag-duty niadtong milabay’ng adlaw aron moabag sa kampanya sa pagpatunhay sa kahapsay ug kalinaw.
Samtang sa dakbayan sa Talisay dunay 34 ka mga FTPs nga gidestino sa maong dakbayan ug duna say uban pang FTPs sa Mandaue ug sa Lapulapu.
Si Sr. Supt. Patrocinio Comendador, hepe sa kapulisan sa dakbayan sa Sugbu mipadayag sa iyang kalipay nga nadugangan ang ilang personnel sa CCPO kay ang FTP dako kaayo'g ikatabang kanila karon.
Sumala pa ni Comendador nga ang maong mga FTP ubos sa central control sa Operations Branch sa CCPO ibutang kini sa beat patrol, ingon man sa investigation aron usab mabansay sa ilang trabaho.
Gibutyag niini nga sukad sa pag-deploy sa mga FTP diha sa dalan Colon ug ubang area dinhi sa dakbayan nga makita sa publiko niminos usab ang snatching ug ang uban pang krimen.
Pipila sa mga FTPs wala pay mga armas samtang ang uban dunay kaugalingong armas, kadtong wala pay mga armas pa-isyuhan sa CCPO aron duna sila'y madala sa ilang pagpatrolya.
Gipahimangnoan hinuon silang di magpabadlong susama sa gibuhat sa ubang mga nag-FTPs nga wala pa gani hingpit mahimong polis duna nay giatubang nga mga kasong administratiba.
Gibutyag ni SPO3 Cleofas Bonjoc sa Talisay City Police dihang nahinabi sa Banat News ang dugang 34 FTPs gipakatap dayon sa nagkadaiyang bahin sa dakbayan, particular na niini ang sa South Road Properties diin mahitabo ang pagtulis ug pagpatay kang Fr. Obencio Rabusa.
Matud ni SPO3 Bonjoc nga bisan pa sa pagkasikop ug pagpasaka og kaso sa upat ka mga suspek nga nitulis ug nipatay kang Fr. Rabusa apan wala gihapon sila'y kompyansa tungod kay duna pay daghang mga batan-on sa ilang lugar ang nalambigit sa lain-laing gangs ug maoy responsable sa mga pagpanulis sa dakbayan.
Ang FTP sa Talisay anha ibutang sa Tabunok, Tangke ug Cansojong matag adlaw ug gabii, sa pagkakarun moabot na og 120 ang tanang mga polis sa dakbayan sa Talisay apil na ang dugang 34 ka FTPs.
Ang dakbayan sa Mandaue nakadawat usab og dugang 75 ka FTPs sugod sa milabay'ng adlaw nga ilang i-deploy sa kadalanan samtang ang sa Lapulapu 50 ka FTPs ang nadugang sa ilang pwersa. - BANAT NEWS