Hinabang sa nasunogan nagpadayon

CEBU, Philippines - Mga nasunogan sa barangay sitio Sapa-Sapa sa barangay Subangdaku, dakbayan sa Mandaue padayong makadawat og hinabang gikan sa City Social Welfare and Development Office (CSWD) sa maong dakbayan ug gikan usab sa mga nagkadaiyang pundok sa katilingban.

Si Jocelyn Domingo sa CSWD sa Mandaue nga nahinabi sa Banat News miingon nga ang padayon nilang pagpanghatag og hinabang sa mga biktima sa sunog sa maong lugar.

Matud pa ni Domingo mokabat sa 59 ka mga pamilya ang nawad-an og panimalay ug 27 usab niini ang mga nag-abang.

Dugang pa ni Domingo nga naglakip sa ilang gihatag nga hinabang mao ang mga linata nga pagkaon nga sama sa sardinas, noodles, bugas, habol, tsenilas, banig ug mga galamiton sa kusina.

Si Domingo miingon nga gitinguha usab nila nga kahatagan og hinabang nga housing materials ang mga biktima aron makabalik sila og tukod sa naugdaw nilang mga balay. -  BANAT NEWS