I-house to house pagpangita sa kapolisan

CEBU, Philippines - Kapulisan sa dakbayan ug lalawigan sa Sugbu mopahigayon og house-to-house campaign kagahapong adlawa pagpatuman sa “Oplan Kontra Buga” sa pagsubay sa mga loose firearms.

Kini aron madokumentohan ang mga armas kansang lisensya wala ma-renew atol sa gihatag nga registration.

Ang hepe sa kapulisan sa dakbayan sa Sugbu Sr. Supt. Patrocinio Comendador miklaro nga mohimo gyud sila'g house-to-house campaign labot na niini.

Apan sa pagkakaron magpaabot lang una sila sa order gikan sa ilang uluhang buhatan alang na sa pagpatuman niini nga mapatuman usab ang amnesty program sa gobiyerno batok niadtong mga tawong nagtiner og mga armas nga walay mga dokumento.

Sumala pa niini nga iyang tahasan ang iyang mga sakop sa paghatud sa mga suwat niadtong dunay armas nga wala ma-renew ang lisensya sa pag-renew niini samtang ipahibalo niini ngadto sa publiko nga isurender ang ilang mga armas nga way dokumento.

Hinuon giklaro ni Comendador nga ang ilang kampanya sa CCPO sa mga armas nga walay lisensya nagpadayon kini sukad pa kaniadto.

Samtang si Sr. Supt. Jesus Gacquing, hepe sa kapulisan sa lalawigan sa Sugbu mipatawag usab og command conference sa mga chief of police sa kalungsuran kagahapong adlawa diha sa Cebu Provincial Police Office (CPPO) headquarters.

Si Gacquing, mimando sa mga chief of police sa kalungsuran nga maoy manguna sa pagsuroy sa ilang mga dapit pag-kumbinser niadtong mga tawong dunay armas nga walay lisensya nga isurender nalang.

Samtang gikinahanglang ila usab nga ipadangat ngadto ang mga notisya sa mga tawong dunay armas nga ipa-renew gayud niini ang lisensya sa ilang armas.

Ang hepe sa Operations Office sa CPPO Sr. Insp. Nilo Cernio, miklaro nga aduna sila'y mga listahan gikan sa Camp Crame niadtong mga tawo sa probinsya sa Sugbu nga adunay mga armas nga wala ma-renew ang lisensya.

Matud pa niini nga kun dili mosanong ang maong mga owner og armas sa ilang awhag nga ipa-rehistro pagbalik ang ilang armas mapugos sila pagkuha’g search warrant sa korte aron kini kumpiskahon.

Dugang pa niini nga usa sa daghang mga loose firearm sa probinsya mao ang dakbayan sa Danao, Toledo, Talisay mga silinganang dakbayan, samtang sa mga lungsod nag-una ang Tuburan.

Ang maong kampanya isip pagsanong sa tinguha ni Presidente Gloria Macapagal Arroyo nga makuhaan og 3% matag bulan ang mga loose firearm dinhi sa nasud.

Nasayran nga ang Central Visayas adunay 55 mil ka loose firearms, 16 mil sa probinsya sa Sugbu, 22 mil sa dakbayan sa Sugbu ug 1.2 milyones lukop nasud. -  BANAT NEWS