Peryahan sa Cogon-Ramos ipatangtang

CEBU, Philippines - Posibleng mag-atubang og kaso ang usa ka sakop sa Cebu City Traffic Operations and Management (Citom) nga giingong maoy nangabugar nga makakuha og permit ang peryahan diha sa barangay Cogon-Ramos ning siyudad.

Ang permit sa nahisgutang peryahan gibasura sa Citom tungod kay kini giingong anaa sa dalan gibutang atbang sa barangay hall.

Matud pa ni Citom executive director Arnel Tancinco nga iya nang gimanduan ang traffic enforcer nga si Basilio Bolabola pagpapahawa sa peryahan sa nahimutangan niini.

Nasayran ni Tancinco nga si Bolabola maoy milukat og permit alang sa nahisgutang peryahan nga taud-taud nang nag-operate diha sa maong barangay.

Gitataw ni Tancinco nga kung dili mahimo sa traffic enforcer ang pagpapahawa sa peryahan kini ila unyang pasakaan og kasong administratiba. -  BANAT NEWS