Suspek pagpatay sa pari gikiha na

CEBU, Philippines - Pormal nang napasakaan og kasong robbery with homicide kagahapon sa buntag diha sa piskaliya sa dakbayan sa Talisay ang upat ka suspek lakip niini ang menor sa pagtulis ug pagpatay kang padre Jovencio Rabusa.

 Sila si Roselo Ravanes, Jonas Turawan, Gerald Tradio ug ang menor nga si “Duka” ang gipaubos sa inquest proceedings ni Talisay City Prosecutor Marshal Rubia.

Si Rubia ang mibutyag ngadto sa tulo ka hingkod na nga mga suspek sa ilang katungod diin pwede silang moduso og waiver of detention aron dili una mapasaka ang kaso ngadto sa korte ug gihatagan sila og usa ka semana nga makaduso sa ilang counter affidavit.

Apan ang maong mga suspek ang mihukom nga ipasaka na lang dayon ngadto sa korte ang ilang kaso.

Si Rubia sa pakighinabi niini sa Banat News kagahapon nagkanayon nga ang maong kaso wala magtugot nga makapiyansa ang mga suspek ug kung makombikto mabilanggo sila sa tibuok nilang kinabuhi.

Samtang ang minor nga suspek, mag-agad pa ang piskalya sa evaluation report gikan sa City Social Welfare and Development kung nasayod ba kining sayop ang iyang gihimo o dili.

Kagahapon gikatakda nang maduso ngadto sa korte ang kaso batok sa tulo ka suspek tungod kay nasuta ni Rubia nga duna kini igong basehanan.

Sa laing bahin, si Tradio kinsa usa sa mga suspek ang mihimakak sa pasangil batok kaniya kini bisan paman dunay mga saksi nga mitumbok kaniyang apil sa maong krimen ug giingong apil kini sa pagbaligya sa cellphone sa pari.

Niadtong Biyernes sa gabii ang Nokia 2600c-2 nga cellular phone ni padre Rabusa ang na-recover sa mga polis gikan sa gibaligyaan niini nga taga barangay Cansojong.

Usa sa mga witness niini mao ang 17-anyos nga lalaki kinsa miluwat og affidavit ngadto sa polis.

Gibutyag sa maong menor nga mga alas 10:00 sa gabii human mahitabo ang pagtulis ug pagpatay kang Padre Rabusa samtang diha siya sa gawas sa balay sa iyang iyaan si Turawan ug Ravanes ang miduol kaniya ug mitanyag nga duna sila'y cellphone nga ibaligya lakip na niini ang charger apan matud sa menor nga wala siya’y kwarta hinungdan nga ang duha iyang gi-refer ngadto sa iyang uyoan kinsa maoy mipalit sa nahisgutang butang sa kantidad nga P1,200.

Kagahapon sa buntag si Aristarco Rabusa, 36, manghod sa biktima ang miila sa cellphone nga na-recover nga iyaha sa iyang igsuong pari.

Sa laing bahin usab, si Ravanes mibutyag nga ikatulo na niya kining higayon karon nga napriso, napriso na siya sulod sa pito ka buwan diha sa Talisay City Jail tungod sa kasong attempted homicide diin nanunggab siya og barbecue stick kang Rotche “Kulot” Tura kay giingong gibaharan siya niini. - Brenda Batuto (BANAT NEWS)