Libreng operasyon sa bungi ilusad

CEBU, Philippines –  Usa ka gatos ka mga batang bungi kon ‘cleft lip’ ug ‘cleft pallet’ libreng operahan sa Rotaplast International District 5050 ug sa probinsya sa Sugbo sugod Septiyembre 15 hangtod sa Oktobre 23 ning tuiga.

Ang maoy lakang gipangulohan sa Rotary Club of Cebu Port Center nga mipahibalo niini miaging 888 Forum sa Waterfront Lahug dakbayan sa Sugbo.

Kini maoy unang misyon sa Rotaplast gawas sa South America sa ilang ikapito ka-tuig nga pagserbisyo sa katawhan ug napilian pa nila ang Sugbo sa ilang misyon sumala pa ni Anton Florentino kanhi district governor sa Rotary Club of Cebu.

Ang Rotaplast International usa ka humanitarian organization nga naghatag og libreng serbisyo sa mga katawhan nga dili makaabot og bayad niini.

Ang usa ka operasyonan sa maong sakit mokabat og P70,000 hangtod sa P100,000 apan pinaagi niining maong proyekto malibre ang mga batang bungi nga gipangidaron og usa ka tuig pataas.

Kini kun makapasar ang bata sa pre-screening nga himuon sa Hulyo 18, alas-8 hangtod sa alas-12 sa udto, sa outpatient department sa VSMMC ning dakbayan sa Sugbo. – Johar Lapasaran (BANAT NEWS)