2nd One Visayas project mahinayon gyud

CEBU, Philippines – Ipahigayon na karung sunod tuig ang ikaduhang One Visayas Culture and Arts convention imbes karun pa untang 2011 pa ipahigayon segun sa gikasabotan. Kini human nasabotan ning bag-o sa hiniusang tigum sa Regional Development Council Committee nga gilangkoban sa mga representante sa tulo ka rehiyon, 6,7, ug 8 human si Gobernador Victor Tanco sa Capiz City nagtinguhang maoy mo-host sa maong kalihokan atol sa National and Provincial Arts Month karung bulan sa Pebrero sunod tuig.

Ang One Visayas gimugna ni Gobernador Gwendolyn Garcia ug gilusad kini niadtong bulan sa Oktobre sa miaging tuig diin ang kadagkuan sa tulo ka Regional Development Councils (RDC)’s mianhi gyud sa Sugbu nga maoy nagdala’g mensahe ngadto na sa ubang probinsya ang maong kalihokan.

Si Gov. Tanco misuwat kang Garcia kinsa maoy chairperson sa RDC Committee ug mipadayag sa iyang kalipay nga ang Capiz maoy napiliang lugar sa sunod nga kalihokan.

“For the purpose of not breaking the momentum and spirit brought by the success of the first One Visayas in Cebu, I would like to request you and the members of the RDcom to transfer the celebration in February 2010 instead of 2011,” matud pang Tanco sa iyang suwat ngadto kang Garcia.

Sumala pang Tanco ang bulan sa Pebrero gihulagway niini nga “the most opportune time since we will also be celebrating the National and Provincial Arts Month.”

 Si Gobernador Salvacion Perez, chairperson sa RDC 6 ug Mayor Mel Senen Sarmiento, chairperson sa RDC 8 ug ubang miyembro sa RDC tibuok Visayas region mitambong atol sa tigom ning bag-ohay lang diha nga gipahigayon diha sa Capitol Social Hall.

Ang One Visayas nahulma atol sa milabay’ng tigom didto sa Iloilo City dihang nagtagbo ang kadagkuan sa RDC sa Eastern, Central ug Western Visayas nga dunay tema nga “One People, One Vision,” diin ipakita niini ang tanang festivals nga naghulagway kabahin sa lain-laing mga produkto ug uban pa.

Matud ni Garcia ang maong proyekto tumong ug tuyo ini mao ang pagpalapad sa cultural bond gikan sa lain-laing kaislahan sa Visayas region. – Rey Pasaporte (BANAT NEWS)