Sa Septiyembre Mass wedding himuon

CEBU, Philippines – Mopasiugda na usab og mass wedding ang kagamhanan sa dakbayan sa Sugbu alang niadtong mga magtiayon sa siyudad nga nag-ipon lang nga wala makasal.

Kini na maoy ikaupat ka higayon nga ang City government mopasiugda og mass wedding alang sa kabus nga mga magtiayon sa kabarangayan.

Sama sa gihapon, dunay mga rekisitos nga angayang komplituhon niadtong nag-live in aron makapahimulos niini karong Septiyembre 26.

Nag-una niini, mao nga ang magtiayon nag-ipon na og labing minos lima ka tuig ilabi na niadtong nakabaton na og mga anak.

Lakip na usab sa mga rekisitos ang Birth Certificate, Cedula, Barangay Certificate, Cenomar, Baptismal ug Confirmation Certificates, Permit to Marry, ug uban pa.

Matud sa administrative officer sa Cebu City Women and Family Affairs Commission nga si Mila Satina, gikinahanglan usab nga ang magtiayon mopirma og application form.

Nagkanayon si Satina nga ang application form alang sa mass wedding anha makuha sa buhatan sa KALIPI diha sa Ramos Public Market ning siyudad.

“Project ni sa City government nga matabangan tong mga pobre gikan sa mga barangay nga nag-live in lang nga makasal,” miingon si Satina.

Niadtong miaging tuig, labing minos 50 ka paresan ang mipahimulos sa gipasiugdahan sa dakbayan nga mass wedding.

Niining higayuna, 150 ka paresan ang gitinguha sa City government nga makasal karong Septiyembre diha sa Redemptorist church.

Libre ang bayranan sa marriage fee ug gitinguha usab karon sa siyudad nga malibre ang bayad sa Certificate of No Marriage (Cenomar) niadtong magpakasal.

Angkunon usab unya sa City government ang gasto sa reception human sa kasal ug ang principal sponsor unya niini mao usab ang mga opisyal sa dakbayan.