Puya tupad sa lungon napunitan

CEBU, Philippines – Usa ka puya nga gituohang bag-ohay pang gi-anak ang nakit-an sa mga bata nga gilabay daplin sa karsada sa provincial road sa barangay Marangob siyudad sa Bogo niadtong Miyerkules sa alas 5:30 sa hapon.

Matud pa ni PO2 Jim Susvilla sa Bogo Police station dihang nahinabi sa Banat News may mga tinun-an sa elementaryang gikan sa eskuwelahan paingon na untang mamauli dihang ilang nakit-an ang usa ka gamay’ng kahon nga giporma og longon daplin sa dalan.

Tungod sa kakuryoso sa mga bata ilaha kining gitan-aw nagtuo silang wala kini sulod apan usa ka suwat ang ilang nakit-an sa sulod niini.

Diha diay sa tupad sa maong kahon ang maong puya nga nagsugod na og kadugta nga gihanigan og mga panapton.

Sumala pa sa kapolisan ang suwat diha sulod sa maong kahon may nakasuwat nga “end of frustration and now the beginning of happiness” nga gituohang gikan sa inahan.

Ang kapitan sa barangay nga si Nilo Catadman mao nay mipahibawo sa kapulisan kabahin sa maong puya ug maoy miasikaso sa pagpalubong niini. – Darrel Carumba (BANAT NEWS)