Polis nga giingong hubog gisuspenso og 3 ka buwan
CEBU, Philippines – Nangayo’g pasaylo ang hepe sa kapolisan sa lalawigan nga si Sr. Supt. Jesus Gacquing ngadto kang Gobernador Gwendolyn Garcia kabahin sa dili maayong binuhatan sa usa sa iyang mga sakop.
Si Gacquing mipahamtang og silot nga tulo ka buwan nga pagka-suspenso batok ni PO2 Noel Rodriguez nga nadestino sa Oslob Police station gumikan kay gikatahong ni-duty kini sa police station nga hubog.
“(PO2 Noel) Rodriguez is now serving suspension from June 22, 2009 up to August 20, 2009 for the offense and appropriate action will be undertaken against this fellow to further discipline him,” matud pang Gacquing sa unod sa iyang suwat nga gipadala kang Garcia nga penetsahan niadtong Hulyo 2.
Ang gobernador mitawag kang Gacquing ug mipahibawo niini kalabot sa maong insidente niadtong Hunyo Uno.
Agi’g tubag sa gipahibawo sa gobernador si Gacquing dihadiha mimando gilayon sa hepe sa Oslob Police Station Sr. Insp. Juan Casipong nga mosumiter og incident report kabahin sa gihimo ni Rodriguez.
Si Rodriguez gikatahong hubog nga ni-duty sa Oslob police station niadtong Hulyo 7 pasado alas 11:30 sa buntag.
Matud ni Casipong iya nang gi-warningan ang maong polis sa dihang iyang nahibaw-an nga ni-report kini sa police station nga nakainom og ilimnong makahubog.
Dugang nasayran si Rodriguez bag-o lang sab gi-serbisyohan niini ang 21 days nga pagkasuspenso ug bag-o lang siya nagsugod og report didto sa Oslob Police station. – Rey Pasaporte (BANAT NEWS)
- Latest
- Trending
