Way NPA sa Balamban - Gacquing

CEBU, Philippines – Kadagkuan sa kapulisan sa lalawigan sa Sugbu miklaro nga wa nay mga rebeldeng New Peoples Army (NPA) nga naglihok diha sa kabukiran sa lungsod sa Balamban karong mga panahuna ug mga armadong kriminal ra maoy naglihok diha karon.

Kini maoy giklaro ni Sr. Supt. Jesus Gacquing Jr. hepe sa kapulisan sa lalawigan sa Sugbu human ang mga barangay tanod ug Citizen Armed Forces Geographical Units (CAFGU) ingon man sa barangay Gaas, Balamban gi-ambusan sa mga armadong tawo niadtong Lunes sa gabii.

Matud pa ni Gacquing nga nahibalo na niini ang buhatan sa Police Regional Office sa kapulisan labot sa maong pagpangatake apan nasuta nila sa Cebu Provincial Police Office (CPPO) nga dili mga NPA.

Gipasabot niini nga ang maong pagpangrakrak usa lang ka pagpang-harass sa grupo ni “Paran” usa ka lider sa mga kawatan diha sa maong dapit ngadto na sa ilang gikontrahang testigos sa kaso batok sa grupo sa mga akusado nga nalambigit sa tulis ug kawat diha sa bukirang lugar sa Balamban.

Si Chief Insp. Resty Santos, hepe sa Balamban police gimandoang pakasuhan ang grupo ni Paran.

Kahinumduman nga naukay ang mga lumolupyo sa barangay Gaas niadtong Lunes sa gabii human gi-ambusan ang mga barangay tanod ug Cafgu sa grupo sa mga tulisan nga si Paran.

Ang mga tanod ug Cafgu mi-responde sa lugar human gisulong sa grupo ni Paran ang panimalay sa ilang gidumtang testigos sa kaso batok kanila.

Gikatahong ang mga police sa Balamban ug mga sundalo sa 78th Infantry Battalion misibog paggukod sa grupo ni Paran human maka-posisyon sa pikas bungtod niadtong gabhiuna. – BANAT NEWS