Kawani sa DEPW nasikop

CEBU, Philippines – Maayong pagkasikop sa usa ka kawani sa Department of Engineering and Public Works (DEPW) nga mi-punch-in sa Daily Time Record (DTR) sa laing empleyado sa maong buhatan.

Ang nasignit sa mga sakop sa Civil Security Unit (CSU) mao ang usa ka Glynis M. Alingasa nga sakop sa assistant head sa nahisgutang departamento.

Sa report sa OIC sa CSU nga si Vicente Quintana gitataw niini nga ilang nasakpan sa akto si Alingasa nga nagdala sa DTR sa kauban niining kawani.

Ang nahisgutang kawani naila nga usa ka June Nadine Sison, ang labaw sa construction division sa DEPW.

Gipadangat na ni Quintana ngadto sa City Legal Office ang report niini alang usab sa tukmang lakang nga pagahimoon batok kang Alingasa.

Ang pag-punch-in sa DTR sa laing kawani giingong usa ka dakong kalapasan nga nalatid sa lagda sa Civil Service Commission (CSC).

Nasayran nga ang labaw sa DEPW nga si Engr. Nicomedes Leonor una nang nipagawas og memorandum nga gidili ang maong buhat.

Ang memorandum giluwatan ni Leonor tungod kay giingong nabatasan na sa ubang mga kawani sa DEPW ang pagpa-punch-in sa DTR niini pinaagi sa ilang mga kauban.

Walay suwerte si Alingasa tungod kay kini maoy naaktuhan sa mga sakop sa CSU atol sa pagpahigayon niini og operasyon sa miaging pipila ka mga adlaw.

Ang nahisgutang kawani giingong wala na mo-report sa iyang trabaho niining semanaha tungod kay kini dunay personal nga giatiman.

Gikataho nga ang gibuhat ni Alingasa gihimo usab sa pipila ka mga empleyado sa ubang mga departamento diha sa City Hall.

Butang nga gipanid-an na usab karon sa mga sakop sa CSU alang sa lain na usab niining operasyon nga pagahimoon. – Elly Bolonos (BANAT NEWS)