CEBU, Philippines – Gisugdan na sa Comelec sa dakbayan sa Sugbo ang pagpahigayon og satellite registration niining buwana sa mga dagkong unibersidad dinhi sa siyudad.
Ang giduaw sa Cebu City Comelec Office kagahapong adlawa mao ang University of San Jose-Recoletos (USJ-R) diha sa dalan Magallanes.
Ubay-ubay nga mga tinun-an sa north district ang nakaparehistro atol sa nahisgutang satellite registration ug mahimo nang makabotar sa umaabot nga eleksyon.
Matud ni City Election Officer Attorney Marchel Sarno nga lakip sa nagparehistro mao kadtong molupyo sa mga barangay nga duol ra sa maong tunghaan sama sa bag-ong mga botante gikan sa barangay Ermita, Santo Niño, Kalubihan, Pahina Central ug uban pa.
Sa makausa pa, gipadayag ni Sarno nga gusto lang nilang mapaduol ang Comelec sa mga aplikante hinungdan nga ilang gipasiugdahan ang satellite registration.
“We bring the Comelec closer to you, meaning closer to the applicant for registration, mao na ang gibutang sa among logo,” sumala ni Sarno.
Karong umaabot Hulyo 22, isunod na usab sa Comelec ang University of San Carlos-Talamban Campus (USC-TC) pagpahigayon og satellite registration.
Sama sa gihapon, ang mga molupyo sa kabarangayan duol sa nahisgutang tunghaan mahimo usab nga makaparehistro sa maong adlaw.
Samtang unya sa Hulyo 23, ang Cebu Normal University (CNU) na usab ang duawon sa Comelec alang gihapon sa nahisgutang katuyoan.
Gawas sa nagkadaiyang unibersidad, miingon si Sarno nga magpadayon gihapon ang ilang pagpahigayon og satellite registration sa kabarangayan.
Gani karong Hulyo 18, ang barangay Sambag 1 maoy gitakdang duawon sa Comelec pag-atiman niadtong wala pa makaparehistro nga mga molupyo.
Nasayran nga ang Comelec sa Cebu City South District mitakda na usab og satellite registration alang sa barangay Guadalupe, Basak San Nicolas ug uban pa.
Hinuon sa kasamtangan, padayon pa nga gihugupan sa mga aplikante ang nahisgutang buhatan nga nagtinguha usab nga marehistro. – Elly Bolonos (BANAT NEWS)