CEBU, Philippines – Usa ka giingong miyembro sa Bloods Gang namatay human kini tabangi og kulata sa iyang mga kontra nga mga sakop Crips Gang didto sa F. Llamas street, barangay Tisa kagahapon sa buntag.
Ang biktima mao si Luisito Villa alyas Bakatoy, 23, nga taga F. Llamas samtang ang duha sa sa lima ka mga suspetsado nga nadakpan sa kapolisan nailhan nga mao sila si Paul John Alegrado,18, ug John Patrick Calo alyas Bkchic, ug lain pang tulo ka nila ka kauban kansang ngalan wala ibutyag , nagpabilin pang gawasnon.
Si Calo nga nahinabi sa Banat News mibutyag nga silang lima kinsa pulos miyembro sa Crips nagduwa og computer games sa maong higayon dihang milabay ang biktima ug nagbinastos kuno kini kanila. Hinungdan nga iya kuno kining gisita apan nasuko kini matud pa, hinungdan nga gitabangan nila kini og kulata unya natumba ang biktima ug napantok ang ulo sa sementadong karsada nga maoy hinungdan sa hinanaling kamatayon niini.
Si SPO1 Jay Yballe sa Homicide Section sa Cebu City Police Office, nagkanayon nga tun-an pa nila ang kaso nga angay isang-at batok sa lima ka suspetsado. – BANAT NEWS