Santos nga Misa para ni Cory gi-amahanan ni Tony

CEBU, Philippines – Si Kongresista Antonio Cuenco sa habagatang distrito sa siyudad sa Sugbu, iyang asawa nga si kanhi Kongresista Nancy Cuenco, pamilya ug mga residente sa distrito mopaluyo sa usa ka “Mass for the Recovery of Former Pres. Cory Aquino.”

Si Msgr. Boy Alesna uban sa laing siyam ka pari nga sakop sa Artsidyosesis sa Sugbu maoy mopahigayon sa Santos nga Misa isip pahinungod ngadto ni Aquino karong Hulyo 12 adlaw’ng Domingo sa alas 8 sa buntag diha sa Metropolitan Cathedral.

Sa nasayran, ang kanhi presidente sa nasud nga si Aquino ug si Kongresista Cuenco nagkauban ug nagkahiusa kaniadto panahon sa Edsa revolution.

Gani ang kongresista ug iyang asawa nga si Nancy maoy mihatod sa kanhi presidente paingon sa Carmelite Monastery sa Mabolo aron adto motago atol sa Edsa revolution. Si Cuenco ang nagmaneho sa sakyanan, samtang si Nancy ang katupad ni Cory sa backseat.

Si Cuenco maoy numero-unong kritiko sa Sugbu sa pamunoan kaniadto ni kanhi Presidente Ferdinand Marcos.

Si Cuenco natudlo nga Minister for Political Affairs sa dihang milingkod si Cory isip presidente sa revolutionary government sa nasud.

Ang banay’ng Cuenco miimbitar sa mga Sugbuanon ilabi na sa iyang distrito nga moduyog sa Santos nga Misa karong Domingo   diha sa Cathedral isip pasalamat sa unang babaye nga presidente sa nasud.

Ang mga dagkong opisyal sa lalawigan ug suod nga higala ni kanhi Presidente Aquino mipadayag nga motambong sa Santos nga Misa. – Rey B. Pasaporte (BANAT NEWS)