Market authority mamawi na'g stalls

CEBU, Philippines – Ubay-ubay nga mga manindahay sa kamerkaduhan sa dakbayan sa Sugbu ang gibaharan karon sa City Market Authority nga bawian og mga stalls.

Partikular na niini ang kapin sa 300 ka mga stallholders nga gihatagan kaniadto og moratorium ni kanhi City Market Administrator Elpidio dela Victoria.

Gihatagan og moratorium ang maong mga vendors tungod kay kini dili maoy orihinal nga tag-iya sa mga stalls apan walay utang sa siyudad.

Sa nasayran, ang moratorium molungtad pa unta sa sunod tuig, apan ang mga vendors gipadalhan na og notisya nga papirmahon og kontrata.

Ang pasidaan gipadangat sa Market Authority ngadto sa mga stallholders niadtong miaging semana ug giingong natapos ang tagal kagahapong adlawa.

Matud pa ni City Market Administrator Racquel Bohol-Arce nga iya na usab nga susihon kung kinsa ang nalakip sa moratorium nga napakyas pagpirma sa contract of lease.

Kini aron iyang ipadangat ngadto sa market authority nga posibling moresulta sa pagbawi unya sa mga stalls nga padayong gigamit niini.

“For those moratorium nga dili maka-contract sulod sa period nga atong gihatag nila, embarguhan na nato sa pwesto sunod semana,” sumala ni Arce.

Nasayran nga nahuman na usab sa pagpangkandado kagahapon ang market authority sa gatusan ka mga stalls sa napulo ka satellite market sa siyudad.

Partikular nga gipangkandaduhan mao kadtong mga pwesto sa mga stallholders nga napakyas pagpirma ug pag-renew sa ilang contract of lease.

Ang mga bakanting stalls sa kamerkaduhan sa dakbayan gitakdang ipaubos sa bidding karong hinapos nga bahin niining buwana.

Lakip unya sa ipaubos sa bidding mao ang mga pwesto sa mga stallholders nga gihatagan og moratorium nga napakyas gihapon pagpirma og kontrata. – Elly Bolonos (BANAT NEWS)