4 ka batan-on natakboyan HIV

CEBU, Philippines – Dugang upat ka mga batan-on dinhi sa dakbayan sa Sugbo duha niini mga estudyante ang natakboyan sa Human Immunodeficiency Virus (HIV) karung tuiga subay sa labing uwahing monitoring sa City Health Department gikan niadtong milabay’ng bulan sa Enero hangtud karung bulana.

Ang hepe sa STD Aids Detection Unit sa City Health Department, Dr. Elia Tac-an Abellanosa mitug-an dihang nahinabi sa Banat News nga sa upat ka mga labing bag-ong kaso sa HIV virus gilangkoban kini sa duha ka mga lalaki ug duha ka mga babaye nga pulos nagpangidaron og 20-anyos pataas.

Matud pa ni Abellanosa ang duha ka mga nataptang tinun-an nga babaye ug lalaki pulos nagtungha sa kolehiyo sa mga inilang tunghaan dinhi sa dakbayan samtang ang usa nagtrabaho og balay kahilayan samtang ang laing usa ka babaye nakakuha sa maong virus tungod sa pagamit og syringe sa gidiling drugas.

Sa kinatibuk-an, gipadayag ni Abellanosa nga moabot na karun og 88 ang tanang na positibo sa HIV virus dinhi sa dakbayan sukad sa ilang monitoring gikan niadtong tuig 1989 hangtud karung panahona apan wala nay record ang City Health kun pila na ning maong mga pasyente ang namatay human mo-develop ang maong virus ngadto na sa sakit nga AIDS tungod kay sagad niini wala nay komunikasyon sa ilang buhatan ug ang uban nibalhin na og puyo.

Matud pa ni Abellanosa sagad makuha ang HIV virus pinaagi sa pagpakighilawas niadtong pasyenteng positibo niini nga motakod ingon man sa paggamit og syringes nga ginamit na sa uban nga manggamitay og gidiling drugas nga duna diay niining maong virus.

Ang siyudad sa Sugbo nag-average lang og upat ka mga kaso sa HIV virus cases matag tuig gawas lang sa milabay’ng tuig nga maoy labing daghan og natala nga napulo ka mga kaso.

Nunot niini giawhag ni Abellanosa kadtong dunay simtomas ning maong virus nga boluntaryong magpahiling sa City Health Department aron madapatan og tambal nga libre aron dili mag-antos sa maong sakit bisan paman og wala na kini kaayuhan. – BANAT NEWS