Traysikad madakpan dili i-uli nakasugat saway

CEBU, Philippines - Nangreklamo ang ubay-ubay’ng mga   traysikad drivers sa dakbayan sa Sugbu tungod sa gihingusgang kampanya sa Citom pagpatuman sa bag-ong ordinansa sa siyudad sa dili na pagbalik kanila sa ilang mga units kun madakpan ug P1,000 nga multa sa drayber.

Kini gihulagway sa apektadong mga traysikad driver nga dili makatarunganon ug nagwagtang sa ilang inadlaw-adlaw nga panginabuhian.

Partikular nga nangreklamo mao ang mga traysikad driver sa Suba, Pasil, Ermita, Punta Princesa, Mambaling ug uban pa nga pulos nadakpan sa Citom.

Mao na lay ilang kahikurat nga dihang ila na untang lukaton ang gisakmit nga traysikad dihang biseklita na lang ang giuli sa Citom wala na ang sidecars.

Sa nasayran, ang brand new nga traysikad mokantidad og P7 mil samtang ang segunda-mano giingong mobalor usab og P5 mil.

Giklaro hinuon ni Konsehal Raul Alcoseba nga wala nila kuhai og kapanginabuhian ang mga traysikad driver sa siyudad pinaagi sa maong ordinansa.

Ang konsehal nga maoy nangamahan sa amendatory ordinance mipasabot nga ila lang gi-regulate ang mga traysikad alang sa safety usab sa mga pasahero.

“Sabton gyud na sa mga traysikad driver nga wala nato sila gikuhaan og panginabuhian, kana man gong ubang driver moabusar ba, mosulod gyud sa mga main thoroughfares nga dunay dagko ug kusog managan nga mga sakyanan, unsa man unya ang isagang sa traysikad og madisgrasya ang kanang tuhod sa mga manakay, wa gud nay insurance,” sumala ni Alcoseba.

Gitataw hinuon sa konsehal nga gitun-an na karon sa Citom kung asa ra sa barangay nga mahimong makapamasahero ang mga traysikad ug asa nga mga dalan ang idili kanila.

Apan taliwa niini niingon si Alcoseba nga magpadayon gihapon ang pagpatuman sa Citom sa bag-ong ordinansa nga mag-regulate sa maong matang sa sakyanan.

Tambag sa konsehal aron dili madakpan ug matangtangan og sidecar dili na mosulod sa dagkong mga dalan sa dakbayan.

“Anha ra gyud sila sa interior sa ilang tagsa-tagsa ka barangay, wala man na hilabti sa Citom, makapanginabuhi lang gihapon sila,” dugang ni Alcoseba. BANAT NEWS