Gipusil sa ig-agaw angol

CEBU, Philippines – Samdan ang usa ka ulitawo dihang giunay kini og pusil sa iyang ig-agaw nga daan na niyang kadumot didto sa sitio Tacom Upper Laguerta, barangay Busay, dakbayan sa Sugbo sa miaging buntag.

Ang biktima mao si Aldwin Flores Codera, 19, ulitawo, taga Upper Laguerta, samtang ang suspetsado mao ra usab ang iyang ig-agaw nga si Christopher Pondar alyas Molong, silingan sa biktima.

Si SPO3 Rey Cuyos sa Cebu City Police Office mibutyag sa Banat News nga naglingkod ang biktima atubangan sa usa ka bakery sa ilang lugar, dihang kalit lang mitumaw ang suspetsado.

Unya walay daghang estorya, milanit dayon kini sa gitangkil niyang armas de fuego ug gitirohan dayon ang biktima ug maayo nalang kay imbis bagolbagol ang pontariya, tuong bahin ra sa liog sa biktima ang nasabak sa bala.

Gihatod dayon ngadto sa Cebu City Medical Center ang biktima samtang ang suspetsado gipangita pa karon sa kapolisan. – Lesley Caminade (BANAT NEWS)