Banggiitang kawatan natiklo

CEBU, Philippines – Usa ka banggiitang kawatan nasikop human kini hisakpi sa akto nga misulod ug usa ka panimalay sa Navarro Compound, sa barangay T. Padilla kagahapon sa pasado alas 3:00 sa kadlawon.

Ang suspetsado nailhan nga si Loreto Daylo Bitos Jr. alyas Aydong, 21, nga taga sitio Dust Fan, T. Villa Private Road, sa nahisgutang barangay, kinsa naaktuhan ni Reden Cuevas Navarro, ang tag-iya sa balay nga iyang gisaka nga mihinayhinay na og sigmit sa mga mahalong butang sa sulod sa balay.

Matud pa ni Navarro nga tulo ka mga lalaki ang namat-an niya nga nagbitbit na sa iyang duha ka DVD ug Rice Cooker nga nagkantidad og P7 mil ang tanan.

Gumikan sa iyang kakurat, misyagit siya og kusog kaayo uban sa pagpangayo og panabang sa mga silingan, hinungdan nga nasikop nila ang suspetsado.

Apan sila si Jerson ug Jerome nga maoy giilang kauban ni Bitos, puwerting dali nakaambak sa bintana sa luyong bahin   sa balay sa biktima ug mikaratel ug panagan ug mao karoy gipangita sa kapolisan aron iipon sa pagtanggong kang Bitos kinsa nagpahayahay na karon sa prisohan sa kapolisan sa Parian Police Station. – Lesley Caminade (BANAT NEWS)