Mag-uuma patay na nga nakit-an

CEBU, Philippines – Patay nang nakit-an sulod sa pinuy-anan niini ang 74-anyos nga mag-uuma sa barangay Olivo lungsod sa Tabuelan niadtong Huwebes sa alas 5:00 sa hapon.

Subay sa gihimong pakisusi sa kapulisan nailhan ang namatay nga mag-uuma nga si Fernando Martorillas, 74, usa na ka biyudo ug nag-inusara nalang usab kining nagpuyo sa maong balay human usab nangaminyo na ang mga anak niini.

Matud ni SPO1 Amelito Alcala sa Tabuelan Police dihang nahinabi sa Banat News, ang maong mag-uuma katapusang nakit-an sa mga silingan nga buhi pa niadtong adlaw’ng Martes.

Wala na nila kini makit-i pa sa misunod nga mga adlaw nga migawas sa iyang balay ug sa pagka-Huwebes sa hapon nadiskubrehan nalang kining patay na.

Ang usa sa mga anak niini nga si Erbito Martorillas nitug-an atol sa pagsukit sukit sa kapulisan nga gituohan nila nga gi-atake sa sakit sa kasingkasing ang gikamatyan sa iyang amahan human gikonpirmar niini nga duna kini sakit.

Ang kabanay sa maong mag-uuma dili na sab interesado nga ipa-autopsy pa ang patay’ng lawas sanglit nagtuo sila nga walay foul play ang kamatayon niini. – Darrel Carumba (BANAT NEWS)