Tresurero sa Compostela palagputon

CEBU, Philippines – Ang mga sakop sa konseho sa lungsod sa Compostela uban sa mga barangay kapitan nagpanong midangop sa buhatan sa Ombudsman Visayas kagahapon sa buntag pagduso og reklamo nga pa-imbestigahan ang pagkahanaw sa P7.5 milyones gikan sa panudlanan sa ilang tresurero sa lungsod.

Si Konsehal Tessa Cang, chairman sa Committee of Budget and Appropriations nga nahinabi sa mga tigbalita kagahapon nga duna nay kamanduan si Provincial treasurer nga si Atty. Roy Salubre nga palagputon na ang maong tresurero.

Kini base usab sa kamanduan ni Barbara Ann Aloba State Auditor III sa Bureau of Local Government Finance dinhi sa rehiyon nga nag-awhag kang Mayor Ritchie Wagas nga palagputon na si Lorenzo Almodiel tungod sa pagkahanaw sa maong salapi human sa gihimong audit.

Apan ang mga sakop sa konseho nasagmuyo tungod kay hangtud karon wala kini sunda sa mayor, giingong makaupat na ka higayon nga gipadad-an og suwat ni Salubre ang mayor nga parelibohan si Almodiel ug katapusang suwat niini niadtong Hunyo 8 sa miaging bulan apan wala kini panumbalinga sa mayor.

Giingong wala panumbalinga ang audit report nga nagpahibalo kaniyang kulang og P6,574,011.60 ug ingon man dugang P950,000 nga salapi sa panudlanan sa lungsod. Ang audit team misusi niini niadtong Hunyo 30,2008 gikan sa Oktubre 8,2007 ngadto sa Hunyo 30,2008.

Nasayran nga ang Bureau of Local Government Finance (BLGF) nakapili na og usa sa tulo ka mga pangalang gisumiter sa mayor nga ihulip kang Almodiel ug kini mao si Cleofe Gonzaga.

Si Konsehal Joselito Reynes nga maoy nangamahan sa resolusyon pagdangop sa Ombudsman nagkanayon nga gusto nilang pa-imbestigahan kun asa napunta ang P7.5 milyones nga cash shortage ni Almodiel.

Si Bise Mayor Joel Quiño mitug-an sa mga tigbalita nga ila karung gipangitaan og paagi nga masulbad kining maong problema sa ilang lungsod gumikan kay daghan nang mireklamong mga kawani nga pirming ma-delatar ang suweldo ug karon lang kini nahitabo sulod sa 17 na ka mayor nga nagdumala sa lungsod.

Matud pa niini nga dunay surplus nga pundo sa milabay’ng administrasyon nga P12 milyones ug karon wala na usab nila mahibaw-i kun hain napunta.

“Kinahanglan pulihan ang tresurero namo, wala gyud taga-i og pagtagad sa among mayor ug unsay hinungdan,” matud pa ni Quiño. – Darrel Carumba ug Rey Pasaporte (BANAT NEWS)