CEBU, Philippines – Mokapin sa napulo ka mga piniriso sa Cebu City Jail ang nabuhian atol sa pagduaw sa Justice on Wheels diha sa maong bilangguan sa sayong bahin niining semanaha.
Kini maoy gibutyag ni City Jail Warden Superintendent Efren Nemenio uban sa pagpasalamat sa nahisgutang programa sa Korte Suprema.
Ang gipangbuhiang inmates nag-atubang og nagkadaiyang kaso diin ang uban niini nilapas na ang pagserbisyo sa silot sa kaso nga ilang giatubang apan padayon pang gibilanggo hangtud nga nakuykuyan sa Justice on Wheels.
Matud pa ni Nemenio nga gawas sa direktang nakalaya, dugang 55 usab ka mga piniriso ang buhianan kung mogawas na ang court order niini.
Ang Justice on Wheels program sa labaw’ng hukmanan nagpaduol sa korte ngadto sa mga bilangguan lukop nasod alang sa paghusay sa kaso sa mga inmates ilabi na niadtong ang kaso nangatabunan na sa kalimot diha sa palasyo sa hustisya. Matud ni Nemenio nga sukad sa unang pagduaw sa Justice on Wheels diha sa City Jail niadtong miaging tuig, mokapin na sa 1,720 ka binilanggo ang nakagawas. – Elly Bolonos (BANAT NEWS)