Nangeskapo nadakpa'g balik

CEBU, Philippines – Lima ka mga naka-eskapong minor de edad sa Regional Rehabilitation Center for Youth sa barangay Candabong lungsod sa Argao ang nadakpan og balik sa kapulisan sa lungsod sa Sibonga niadtong Martes sa alas 8:00 sa gabii.

Ang nangadakpan og balik nag- edad pa og 16-anyos, 17-anyos, duha ang 18-anyos ug usa ka 19-anyos nga dunay nagkalain-laing mga kaso.

Matud pa ni PO2 Ederlino Bacusmo sa Sibonga Police dihang nahinabi sa Banat News ang 16-anyos taga siyudad sa Sugbo ug nag-atubang og kasong concealing deadly weapon, samtang ang 17-anyos nga taga Gun-ob siyudad sa Lapulapu nag-atubang og kasong murder, ug ang duha ka 18- anyos taga Poblacion Oslob nag-atubang og kasong theft ug ang laing usa taga lungsod sa Consolacion ug nag-atubang og kasong robbery samtang ang 19-anyos taga barangay Nangka Consolacion nag-atubang og kasong Homicide.

Matud ni PO2 Bacusmo nadakpan ang lima human daling may nakahatag og impormasyong nasigpatan sila nga nanglakaw lang diha sa sitio Dumlog sa barangay Simala paingon sa lungsod sa Sibonga.

Ang lima subling gidala sa RRCY kagahapong adlawa. – BANAT NEWS