CEBU, Philippines – Laing eskandalo na usab ang nisibaw ug gisaw-an saw-an sa mga opisyal ug mga empleyado sa Cebu City Hall sa nangaging mga adlaw human usa ka konsehal sa dakbayan ang giingong nasakpan sa iyang asawa nga nakigrelasyon sa usa sa mga sakop sa Mayor’s Management Team (MMT).
Ang taho nagkanayon nga ang konsehal (ngan gipugngan) nasakpan sa asawa nga miduaw sa balay sa maong sakop sa MMT ug nahitabo ang komprontase.
Gani ang konsehal giingong gipuspusan og balde sa asawang nagkurog sa kalagot ug wala kapugong sa kaugalingon tungod sa kasuko.
Dili hinoun makatoo ug na-shock ang kadaghanan sa mga kawani sa City Hall sa maong kasayuran tungod kay buotan ang maong konsehal.
Ang asawa niini usa usab ka kawani sa City Hall gikatahong moreklamo ngadto sa Department of Interior and Local Government (DILG) batok sa iyang bana.
Apan si City DILG Director Patricio Gabuya mipadayag nga wala pa sila’y nadawat nga susamang reklamo apan kini mipasabot nang daan nga wala usab sila’y hurisdiksyon niini tungod kay kini personal ug walay kalabutan sa trabaho sa konsehal.
Sa iyang bahin, nakuryuso na usab si Acting Mayor Michael Rama sa taho nga iyang nadawat nga gihimo nang sumsuman sa ubang mga kawani.
Gani miingon ang acting mayor nga iya usab nga sitahon ang hingtungdang opisyal atol unya sa ilang umaabot nga panagtigom.
“When there will be a gathering of councilors mao ni akong isulti nila nga sige man ning huhungihong, now, paki-enlighten ning ubos ninyong higala, unsa man ni, aron atong matagaan og panglantaw before modako, kay naa ra bay panultihon nga kung naay aso naa gyoy kayo,” sumala ni Rama. – Elly Bolonos (BANAT NEWS)