Lakas-Kampi way nakitang problema

CEBU, Philippines – Walay nakitang kakulian sa pagpili og kandidato pagka kongresista sa ikaunom nga distrito sa lalawigan sa Sugbo alang sa 2010 election ang   Lakas-Kampi dinhi sa Sugbo.

Kini ang gipadayag ni Antero Cana Jr., tigpamaba ni kanhi Mayor Thadeo Ouano nga nahinabi sa Banat News niadtong miaging adlaw.

Matud pa niya nga si Rep. Nerissa Soon-Ruiz nga motapos na sa iyang katapusang termino sa pagka-kongresista giingong modagan pagkamayor sa dakbayan sakbang ni Mayor Jonas Cortes kinsa magpasubli sa katungdanan.

Samtang nag-ilog si Soon-Ruiz ug Cortes pagka-standard bearer sa ilang partido sa dakbayan lahi usab ang kahimtang sa mokandidato sa pagka kongresista sa distrito.

Sa pagkakaron, duna nay mga naglinyang naglaraw nga modagan pagka-kongresista sa 6th District nga naglakip nila ni Mayor Thadeo Ouano, Edmond Sanchez nga project consultant ni Mayor Cortes; kanhi Board Member Gabriel Luis Quisumbing; Provincial Board Member Victor Maambong ug Bise Mayor Carlo Fortuna.

Samtang sa laing bahin, si Kongresista Pablo Garcia maoy gitudlong executive vice president sa Lakas-CMD ug Kabalikat ng Mamamayang Pilipino, samtang si Soon-Ruiz maoy gitudlong interim vice president sa Lakas-Kampi sa Visayas. Si Garcia nagkanayon nga di unya sila magproblema kinsay piliong mokandidato tungod kay dunay National Board nga moresolbar niini apan dunay pipila ka mga opisyal sa local nga sector ang nagduda niini tungod kay dunay mga banggiitang kandidato sa isig ka partido nga buot modagan sa nagkadaiyang pwesto. – Romeo Limpangog uban sa report ni Rey Pasaporte (BANAT NEWS)