CEBU, Philippines – Pormal nang gitudlo ni Cebu City Mayor-on-leave Tomas Osmeña si Attorney Joseph Bernaldez isip Acting City Attorney.
Si Bernaldez maoy nihulip kang Attorney Rodolfo Golez nga gipalagpot ni Osmeña sa katungdanan tungod sa giingong dili maayo niining performance.
Nadawat ni Bernaldez ang iyang bag-o nga appointment sa miaging adlaw nga gipirmahan sa mayor niadtong miaging Hunyo 22.
Usa unya sa mga tahas sa Acting City Attorney nga wala mahimo ni Golez mao ang pagpugos sa mga proprietary schools ug hospitals sa siyudad pagbayad og buhis.
Apan gipadayag ni Bernaldez nga siya nanginahanglan usab og dugang mga abogado nga motabang sa iyang mga gimbuhaton.
Ang Acting City Attorney duna lang kini tulo ka mga sakop nga sila si Attorney Maria Ada Veloso, Attorney Lyndon Basan ug Attorney Milagros Cabatingan.
Matod ni Bernaldez nga bisan og duha o tulo lang ka dugang abogado nga madugang sa iyang buhatan ug motrabaho lang igo na kini alang kaniya.
Duna na hinuoy bag-ong abogado nga mosulod sa City Legal Office nga sakop sa Mayor’s Management Team (MMT) nga si Attorney Amay Abella.
Si Abella maoy nahuna-hunaan ni Bernaldez nga itudlong chairperson sa Employee-Management Committee on Investigation (EMCOI) sa City Legal Office.
Lakip unya sa imbestigahon ni Abella mao ang reklamo ni Assistant City Treasurer Tessie Camarillo nga gikatahong nakadawat og hulga sa iyang kinabuhi.
Nasayran nga gipadalhan na og summon sa EMCOI kagahapong adlawa ang kawani sa city hall nga gidudahan ni Camarillo nga maoy nanghulga kaniya.
Ang suspetsado nga si Leah Casinillo gihatagan lang sa EMCOI og 72 oras alang sa pagtubag sa pasangil ni Camarillo. – Elly Bolonos (BANAT NEWS)