Namusil sa silingan nasikop
CEBU, Philippines – Nasikop sa kapolisan sa dakbayan sa Talisay ang usa ka lalaking suspek sa pagpusil sa iyang silingan niadtong Martes sa hapon diha sa barangay Lawaan II.
Ang maong insidente sa pagpamusil ang nahitabo sa milabay'ng mga buwan diha sa nahisgutang lugar.
Ang suspetsado mao si Efren Oros, hingkod ang panuigon taga barangay Lawaan II sa nahisgutang siyudad.
Dala nila ni PO3 Mike Espina, PO2 Lino Diez ug PO2 Estephen Sefuesca ang warrant of arrest sa kasong attempted murder batok kang Oros nga giluwatan ni Regional Trial Court (RTC) Judge Raphael Yrastorza Sr. sa Branch 14 dihang ilaha kining gisikop.
Si Diez sa pakighinabi niini sa Banat News kagahapon mibutyag nga si Oros ang gikatahong magmaoy kung mahubog.
Matud niini nga ang biktima ug si Oros ang managhigala ug sa pagkahitabo sa maong insidente ang suspek ang giingong hubog.
Gibutyag ni Diez nga nasikop dayon nila si Oros human sa hitabo apan nakagawas tungod kay mibayad og piyansa nga P30 mil apan posibleng wala kini motungha sa hearing sa mao niyang kaso ngadto sa korte hinungdan nga nalutsan og warrant of arrest.
Si Oros kinsa nagtingkagol karon sa Talisay City detention cell ang pabayaron og P120,000 nga piyansa alang sa temporaryo niyang kagawasan. – Brenda D. Batuto (BANAT NEWS)
- Latest
- Trending
