CEBU, Philippines – Mokabat sa 354 ka mga bag-ong police recruit ang pormal nang nanumpa sa katungdanan kagahapon sa buntag sa Police Regional Office (PRO7) sa Camp Sergio Osmeña Sr. ning dakbayan sa Sugbo.
Ang pagpanumpa sa bag-ong mga police recruit gihimo atubangan mismo sa hepe sa PRO-7 Chief Supt. Lani-O Neres nga gitambungan sa ubang mga opisyal sa kapolisan sa rehiyon siyete ug mga kabanay sa mga bag-ong polis.
Si Neres mipadangat sa iyang mensahe ngadto sa mga bag-ong police recruit nga isilsil og maayo sa ilang alimpatakan ang pag-disiplina sa ilang kaugalingon karong nadawat na sa pagka-polis.
Giawhag usab niini ang mga bag-ong police recruit nga morespeto ngadto sa ilang isig katawo isip kabahin sa disiplina nga ilang nakuha gikan sa ilang tagsa-tagsa ka pamilya nga magbuhat og mga maayong binuhatan nga maoy gipaabot sa katawhan.
Samtang giawhag usab niini ang mga asawa, anak ug paryente sa mga bag-ong police recruit nga mohatag usab sila'g suporta sa ilang trabaho nga pagpamolis.
Gibutyag niini nga na short sila karong tuiga og 70 ka mga police recruit sa ilang kota nga 430 gumikan kay gamay ra ang nakapasar sa ilang mga qualification standard nga gipatuman.
Hinuon ilang gipanghinaot sa sunod tuig ang kulang matapakan kini gumikan kay nagkulang gyud sila karon og mga bag-ong polis sa rehiyon labi na nga daghang mi-retiro ingon man mi-optional pag-retiro ug nangamatay.
Samtang si Sr. Supt. Anthony Obenza, mibutyag nga gamay ra gyud ang mi-apply karong tuiga gumikan usab sa kadaghang requirement sa usa ka aplikante sa pagka-polis.
Samtang nadungan usab ang ilang pagpang-recruit sa Philippine Navy ug Bureau of Jail Management and Penology hinungdan nga dunay ubang mga aplikante mopili sa maong ahensya sa gobiyerno.
Ang maong mga police recruit adto kini sa lungsod sa Sibonga ipaubos sa training sulod sa unom ka bulan, human niini ibalhin sila sa Regional Training School (RTS).
Base sa ilang gipagawas nga listahan sa maong mga bag-ong recruit gikan sa Sugbo dunay 188 ka aplikante, 78 sa Negros Oriental, 64 sa Bohol, 21 sa Siquijor, tulo sa Police Regional Office (PRO-7). – Guam P. Logroño (BANAT NEWS)