30 ra ka kapitan mitambong

CEBU, Philippines – Moabot lang sa 30 gikan sa 80 ka mga barangay kapitan sa dakbayan sa Sugbo mitambong sa inaugural session sa konseho sa siyudad kagahapong adlawa.

Kasagaran sa mga kapitan nga nanambong naggikan sa mga bukirang barangay sa dakbayan ug anaa pa lang sa ilang unang termino sa katungdanan.

Dili usab matino kun ang maong mga barangay kapitan pulos ba mosuporta kang Rama sa pagpapili niini pagka-mayor sa siyudad sa umaabot nga piniliay.

Wala usab motambong sa inaugural session ang direktor sa Cebu City Police Office nga si Sr. Supt. Patrocinio Comendador.

Nasayran nga ang kapolisan sa dakbayan giingong lakip usab sa wala makauyon sa mga polisiya ni Rama pagdumala sa dakbayan isip acting mayor.

Apan taliwala niini, malampusong gipalanog ni Rama ang mga nahimo sa mga sakop sa City Council sa taud-taod na nilang pagpangatungdanan.

Nag-una sa gipasigarbo sa acting mayor mao ang pagtiwas og renovate sa karaang City Hall nga gitawag usab og Cebu City Legislative Building.

Lakip na usab niini ang pagpanindot sa Plaza Sugbo nga gisubhan ni Presidente Gloria Macapagal Arroyo pipila ka buwan lang ang nakalabay.

Labaw sa tanan, ang pagpalabang og mga ordinansa nga usa sa nakapahimo niining numero uno nga City Council sa tibuok kapupud-an.

Gipadayag usab sa acting mayor nga siya maoy usa sa nangusog nga matukod ang bag-ong building sa City Jail pagluag sa nagpunsisok nga mga piniriso.

Dugang nga gipasigarbo ni Rama mao ang pagpangulo sa mga kalihukan sa Sinulog nga malampusong mipahigayon sa festival matag tuig. – Elly Bolonos (BANAT NEWS)