CEBU, Philippines – Gidasig sa hepe sa Police Regional Office (PRO-7) Chief Supt. Lani-O Neres ang ubang unit sa kapolisan ingon man local government unit sa rehiyon 7 sa pagsagop sa gihimo sa Cebu City Police Office paghulma sa Barangay Intelligence Network (BIN).
Kini human niya makita nga ang (BIN) nga himuonon na nga Police Auxiliary Force (PAF) dako og ikatampo sa kapulisan sa pagpatunhay sa kahapsay ug sa kalinaw .
Gipasabot niya nga gawas nga nagsubay sa maayong sistema, lig-on pa gyud kaayo ang maong grupo tungod sa suporta sa katawhan busa angayan lang sundon usab kini sa nagkalainlaing dapit sa Central Visayas aron sa paggukod sa mga criminal.
Si Neres nakigtagbo sa mga sakop sa BIN niadtong Domingo didto sa barangay Guadalupe diin ipaila niini ang bag-o na unyang ngalan sa BIN nga mahimo nang PAF .
Ang kausaban nahimo human makapusil ang usa ka sakop sa BIN atol sa check point didto sa Salinas Drive, Lahug , dakbayan sa Sugbo niadtong milabay’ng bulan. – Guam P. Logroño (BANAT NEWS)