CEBU, Philippines – Namatay ang usa ka lalaki dihang giluba kini sa gikalayog niya sulod sa usa ka videokehan sa barangay Hagnaya lungsod sa San Remegio niadtong Martes sa alas 2:50 sa kaadlawon.
Ang biktima nga mao si Sadam Gonzales Cabansag, 22 , ulitawo, nga taga Sitio Riverside, barangay Hagnaya, San Remegio samtang ang suspek mao si Badido Ompad, 28 anyos, ulitawo, nga silingan sa biktima ug live-in partner sa tag-iya sa Rose videokebar.
Si Insp. Rolly Lauron, hepe sa San Remegio Police Station mibutyag sa Banat News nga nag-inom ang suspek sa usa ka lamisa sulod sa videokehan, samtang ang biktima ug ang mga barkada niini didto usab sa laing lamesa.
Unya sa kalit may usa ka babayeng misulod sa videokehan nga nangita sa iyang bana ug sa kasuko niini, nagpunay og singgit-singgit hinungdan nga gibadlong sa GRO nga misangpot sa ilang panag-away.
Dihadiha miuwang ang suspek sa duha, dihang ang biktima miduol sa suspek ug gisumbag kini.
Gumikan sa kalagot sa suspek nagsinumbagay sila hangtod nga nagkalinayogay.
Apan dihang milunga na ang ilang panaglayog natumba ang biktima nga mibuhagay na ang daghang dugo niini sa lawas.
Gihatod dayon ngadto sa Verallo District Hospital sa Bogo diin kini ideklarar nga patay na sa paghiabot.
Gipangita pa karon sa kapolisan ang suspek kinsa misibat dayon human sa maong hitabo. – Darrel A. Carumba (BANAT NEWS)