Hot meat sa restaurant gisakmit

CEBU, Philippines – Kapin sa usa ka gatos ka inihaw'ng manok bisaya ang gisakmit sa mga sakop sa Operation Hot Meat sa siyudad sa Sugbu gikan sa usa ka kan-anan diha sa north reclamation area.

Kini tungod kay giingong dili accredited ang ihawan sa Conching’s Lechon Manok hinungdan nga gikunsiderar nga hot meat ang ilang baligyang lechon nga manok maong ilaha kining gisakmit.

Matud pa sa usa sa mga meat inspector sa siyudad nga si Ann Calungsod nga ila nang gipasidan-an ang tagdumala sa maong restaurant nga iparehistro ang ilang ihawan.

Apan matud pa ni Calungsod nga gibaliwala lang ang ilang pahimangno hinungdan nga sila napugos pagsakmit sa 85 ka mga inihaw'ng manok lakip na ang 20 ka inasal.

“Amo na mang gi-inspection ilang ihawan the past weeks unya wala man marehistro, so, among gi-warningan, unya wala man motuman,” sumala ni Calungsod.

Wala na hinuon pamultaha ang tag-iya sa nahisgutang kan-anan human kini mopasalig nga hikayon na ang mga dokumento sa ihawan niini.

Matud pa ni City Veterinarian Doctor Alice Utlang nga ang dakong pahat sa nasakmit nga mga karneng manok ilang gihatag ngadto sa Parian Drop-In Center.

Nidugang si Utlang nga lakip sa gihatagan og bahin sa maong mga hot meat mao si Bogart, ang nag-inusarang tigre nga gibuhi sa Cebu City Zoo. – Elly Bolonos (BANAT NEWS)