CEBU, Philippines – Maguwang nga mipalit sa atraso sa iyang manghod mao hinuoy nadunggaban ug napatay diha sa sitio Suba barangay Sabang sa Isla sa Olango dakbayan sa Sugbu sa milabay'ng gabii.
Ang biktima mao si Jimmy Botalid Cabido, 21, residente sa sitio Kalipay sa maong barangay, gitumbok nga midunggab kaniya mao ang usa ka nailhan lang sa pangalang "Erwin" nga residente sa sitio Lawis barangay Pangan-an sa Olango.
Base sa imbestigasyon ni PO3 Danilo Barinque sa Crime Against Person (Homicide) sa Lapulapu nasuta nga sayo pa niini gikulata ni Erwin ang manghod ni Cabido hinungdan nga gisita kini sa biktima.
Atol sa ilang panaglalis wala makabantay si Cabido nga duna diay mahait nga hinagiban si Erwin diha sa hawak niini ug kalit gidunggab si Cabido diha sa dughan.
Si Cabido daling gidala sa Olango District Hospital apan gideklarar kini nga dead on arrival sa mga mananambal samtang ang suspek daling miikyas ug wala na maapsi bisan sa ilang balay. – Bong Soriano (BANAT NEWS)