Kampanya sa dengue padayon

CEBU, Philippines – Magpadayon ang anti-dengue campaign sa kagamhanan sa dakbayan sa Sugbu bisan kung hingpit nang gitak-opan ang pagtamod sa dengue awareness month sa siyudad.

Kini maoy gibutyag sa dengue coordinator sa dakbayan nga si Doctor Raymund Ogan, atol sa pagpahigayon sa barangay sharing workshop kagahapong adlawa.

Ang workshop maoy pormal nga nitak-op sa pagsaulog sa siyudad sa kinatibuk-ang buwan sa Hunyo isip dengue awareness month.

Gitambungan ang nahisgutang workshop sa mga opisyales sa kabarangayan sa amihanang distrito sa dakbayan ug sa mga local health officials.

Niadtong miaging semana, ang mga opisyales usab sa kabarangayan sa habagatang distrito ang unang gipaubos sa barangay sharing workshop.

Gipaambit sa mga barangay officials ang ilang gipatuman nga mga anti-dengue campaign alang sa paghimo pa niining mas epektibo.

Sa samang higayon giduso usab ni Doctor Ogan ngadto sa ubang barangay nga sagupon ang gipatuman nga programa sa barangay Bulacao, Kinasang-an ug Pahina San Nicolas.

Kini tungod kay ang Bulacao ug Kinasang-an, giingong malampuson nga mipakunhod sa mga kaso sa dengue sa ilang tagsa-tagsa ka mga barangay. – Elly Bolonos (BANAT NEWS)