Natagak sa traysikol patay

CEBU, Philippines – Patay ang usa ka 29-anyos nga lalaking gituohang hubog human kini natagak sa iyang gikapyotang traysikol diha sa sitio Sangi barangay Maghanoy lungsod sa Barili niadtong Domingo sa alas 4:00 sa hapon.

Ang biktima mao si Rafael Ricaplaza, 29, molupyo sa barangay Gunting sakop sa maong lungsod samtang mitahan sa kapolisan ang drayber sa traysikol nga giangkasan mao si Suzimo Abanciña, taga barangay Bulok-bulok, Barili.

Matud pa ni PO3 Job Sarveda sa Barili Police dihang nahinabi sa Banat News namasahero ang maong traysikol gikan sa barangay Japitan paingon sa lungsod dihang mikapyot sakay ang nga gihulagway nga nakainom.

Apan pag-abot niini sa nahisgutang lugar aksidenteng nakabuhi ang biktima hinungdan sa iyang pagkatagak ug nasapid ang tiil ug nalamba ang ulo niini sa sementadong karsada.

Dali untang gitabang ang biktima ug gihatod sa Barili District Hospital apan gibalhin sa tambalanan dinhi sa dakbayan sa Sugbo apan gideklarar kining dead on arrival. – BANAT NEWS