Gipatay sa tawong iyang gitirador

CEBU, Philippines – Usa ka 30, anyos nga lalaki ang gipusil patay sa sitio San Jose barangay Rosario, lungsod sa Aloguinsan niadtong Sabado sa alas 5:30 sa kahaponon.

Ang biktima mao si Romeo Languido, 30, molupyo ra sa maong lugar samtang ang suspek mao si Mario Lope, nagpuyo gihapon sa susamang dapit nga giingong dugay nang kaaway ni Languido.

Matud ni PO1 Stephen Tibon sa Aloguinsan Police dihang nahinabi sa Banat News, giingong nasuko ang suspek sa biktima dihang sa iyang pag-agi sakay sa iyang motorsiklo, gitirador kini sa biktima dayon gisinggitan pa nga pabalikon.

Wala magdugay mibalik ang suspek ug walay daghang estorya gipusil ang biktima sa buko-buko gamit ang wala matinong kalibre sa armas.

Matud sa mga nakasaksi nakabawos pa ang biktima og pusil apan wala na kini makaigo sa suspek sanglit niadtong tungura danag-danag na lang ang reaksyon niini pagdagan palayo apan pipila ka mga metros pa lang natumba kini ug namatay.

Sa pagresponde sa mga polis ang patay'ng lawas sa biktima mao na lay naabtan niini nga paingon nang dad-on sa kapilya sa maong lugar samtang ang suspek nakasibat na pahilayo.

Gikatahong dugay nang nadinumtanay ang duha kaniadto ug mao karoy gituohang motibo sa hitabo. – Darrel Carumba (BANAT NEWS)