CEBU, Philippines - Namatay ang usa ka lalaki human kini malumos samtang naligo sa dagat didto sa barangay Pooc, dakbayan sa Talisay niadtong Sabado sa hapon.
Ang namatay mao si Julito Jovelosa, 36, lumad nga taga Catbalogan, Samar apan temporaryong nagpuyo diha sa Hacienda Ferenze, barangay Maghaway, Talisay.
Sila si PO2 Roelito Tano ug PO1 Jundave David sa homicide section sa Talisay City Police Station mibutyag sa Banat News nga ang biktima miadto sa Pooc kay giimbitar sa birthday sa iyang higala ug samtang nag-inom nagkalingaw usab sila sa pangaligo sa dagat.
Dihang nakita sa biktima nga nalingaw sa pag-dive-dive sa dagat ang iyang mga kauban, misunod usab siya niini.
Apan human sa iyang pag-dive wala na kini makatunga hangtod nga milanat na og 15 minutos nga pinaabot sa iyang mga kauban.
Gumikan sa ilang kabalaka nanawag sila og polis sa Talisay City Police Station ug sa Talisay Rescue Emergency Action Team sa pagpangita kang Jovelosa.
Mao nalay nakita sa mga otoridad nga milutaw na ang lawas sa biktima nga mibutod na busa ila dayong gihatud ngadto sa Talisay City District Hospital diin kini ideklarar nga patay na.
Sa pagkakaron gisuta pa sa kapolisan kun wala bay foul play ang kamatayon sa biktima. - BANAT NEWS