Nakapatay'g silingan nadakpan

CEBU, Philippines -  Usa ka tawo kinsa mipatay sa iyang silingan sa barangay Agus, dakbayan sa Lapulapu niadtong miaging semana nasikop sa kapolisan sa maong dakbayan sa miaging gabii.

Siya mao si Winefredo Coronel Renan, 39, minyo nga nagtrabaho sa usa ka iron factory sa Agus, apan lumad nga taga Pagadian City sa Zamboanga del Sur.

Ang iyang giluba nga namatay mao si Lolito Manuel de Leon, 49, minyo nga taga sitio Gisi, barangay Agus gumikan lang sa panaglalis nga walay hinungdan.

Matud pa sa mga tanod nga sila si Ariel Ramos, Edgar Marie ug Dominador Silawan, nga nagpatrolya sila niadtong higayona dihang nakita nila ang suspetsado nga makapaduda kaayo ang linaktan samtang nagdala og shoulder bag nga gisudlan sa iyang mga senina.

Dihang ila kining gisukit nitug-an dayon nga siya'y nagpatay kang De Leon, busa nagpahayahay siya karon sa prisohan sa dakbayan sa Lapulapu. - BANAT NEWS